Пред државата и пред сите граѓани е исправена историска шанса да го продолжиме европскиот пат, да оствариме уште еден национален интерес. Имаме силна поддршка од ЕУ и од САД којашто треба да ја искористиме. Преговорите со ЕУ течат, скрининг процесот се спроведува успешно и наскоро ќе заврши. Со глас за Европа во македонското Собрание можеме да продолжиме напред кон полноправно членство во ЕУ. Сега зависи од сите нас, рече на денешната прес конференција пратеничката од редовите на СДСМ, Даниела Николова.
– Изборот пред секоја партија, пред секој пратеник е интеграција во ЕУ или изолација. Нема друга опција. Интеграција во ЕУ за подобар животен стандард, сигурна иднина, засилен економски раст и развој на секое поле, – додаде таа.
Николова рече дека пратениците, политичките партии, вклучително и ВМРО-ДПМНЕ имаат обврска и одговорност пред граѓаните и пред иднината на државата, како и дека европскиот предлог за преговарачката рамка е најдобриот договор со ЕУ, и дека подобар договор нема да има.
