Владата предводена од СДСМ и премиерот Димитар Ковачевски продолжуваат со вистинска грижа за граѓаните и стопанството во време на светска економска и енергетска криза. На вчерашната седница на Владата донесена е одлука за обезбедување поевтина електрична енергија за компаниите што произведуваат основни прехранбени производи, истакна на денешната прес-конференција Мартин Костовски, пратеник на СДСМ.
Тоа значи, додава Костовски, дека компаниите што произведуваат основни прехранбени производи, како масло за јадење, леб и пекарски производи, брашно, млеко и млечни производи, како и компании од месната и живинарската индустрија, ќе плаќаат електрична енергија по цена од 80 евра за мегават-час.
„Тоа е повеќе од двојно поевтино од редовната цена на пазарот за мегават-час. Со овие мерки компаниите, производители на основни прехранбени производи, ќе имаат предвидливост, стабилна и поевтина струја, што ќе влијае и врз стабилизирање на цените на финалните производи што се произведуваат и се продаваат од страна на овие компании. Со ваква цена на електричната енергија крајните цени треба да се намалат најмалку 10 отсто“, посочи Костовски.
Според него, тоа значи пониски цени за граѓаните, односно заштита на нивниот животен стандард и на куповната моќ.
„Ова е уште една во низата владини мерки за помош и поддршка на граѓаните и стопанството во време на најголема светска економска и енергетска криза. Со последните пакет-мерки вредни 360 милиони евра ги помагаме граѓаните и компаниите во надминување на последиците од кризата“, дополни Костовски.
