На мостот „ Беласица“ нема посериозни оштетувања и затоа нема да биде потребно негово зајакнување вели во интервју за „Макфакс“ професорот Михаил Гаревски од приватниот Институт за сеизмички отпорни градби и климатски промени. Најоптимистички е дека мостот може да се пушти во употреба во септември.
Испитувањата практично се завршени, вели тој, појаснувајќи дека ќе следи уште едно ласерско скенирање кое, како што додава, нема да смени многу.
„Најсовремено ласерско скенирање на мостот, за добивање на континуирани геодетски резултати на деформација на мостот. Со ова ласерско скенирање кое што ќе биде во тек деновиве, ќе се добие континуитет на поместувањата. Практично ова и не е потребно, но се спроведува за понатамошното пробно товарање, при што ласерски ќе се мониторира мостот кога ќе се донесат камионите“, прецизира Гаревски.
Додава дека експертизата ќе биде готова во понеделник или најверојатно до среда наредната недела.
„Однапред е јасно според нашите анализи, практично не е потребно зајакнување на мостот. Но како што кажав многупати дури и како што кажа градоначалничката ќе треба извесно рефреширање односно лесна санација“, вели професорот.
Објаснува и зошто било направено снимањето со дрон а зборува и за класификацијата на оштетување на мостот.
„Може да се каже дека се приближува накај повеќе оштетен мост, но сепак класификацијата која ќе ја дадеме ќе биде лесно оштетен мост бидејќи никаде не успеавме да видиме откриени кабли. Ризикот е многу поголем кога каблите се откриени“, вели Гаревски.
Тој прецизираше и можен датум кога мостот би можел да биде повторно пуштен во употреба додавајќи дека никој не е крив за тоа што се касни. Истакна дека целиот процес зависи од многу фактори, а сега најмногу од тоа, за колку време ќе бидат отстранети цевките под мостот.
За спротивставените изјави со Арсовска, за тезгарењата, состојбата со другите мостови во државата и слично во интервју за„ Макфакс“ одговара Михаил Гаревски, од приватниот Институт за сеизмички отпорни градби и климатски промени.
