Економските предизвици, странските инвестиции, макроекономските показатели и реалниот животен стандард на граѓаните ќе бидат во центарот на вниманието во вечерашното издание на Ноќно студио кое ќе се емитува на 4TV.mk, со почеток од 20:00 часот.
Во студиото ќе се соочат различни економски концепти и политички позиции, при што претставници на институциите, опозицијата и независната експертска јавност ќе понудат сеопфатна анализа за актуелната состојба во државата.
Меѓу гостите е Гоце Димовски, директор на Технолошко-индустриските развојни зони, кој ќе говори за стратегиите за привлекување странски инвестиции, развојот на индустриските зони и плановите на Владата за забрзување на економскиот раст.
Свој осврт ќе даде и Димитар Ковачевски, кој ќе направи споредба меѓу економските политики од неговиот мандат и актуелните мерки, при што ќе ги изнесе ставовите и критиките од позиција на опозициската СДСМ.
Од експертски аспект, анализата ќе ја заокружи Бранимир Јовановиќ, кој ќе ги разгледа макроекономските показатели, инфлацијата и реалните перспективи за македонската економија во регионален и европски контекст.
Клучното прашање што ќе се отвори е – дали Македонија има капацитет за посериозен економски раст и какви се реалните очекувања за домашните компании и работниците во периодот што следи.
Дали странските инвестиции се доволни за стабилен развој, или граѓаните сè уште ја чувствуваат тежината на економската реалност одговорите ќе ги понуди вечерашната дебата на 4TV.mk.
