Британскиот премиер, Риши Сунак, најави зголемување на буџетот за одбрана за шест милијарди долари во следните две години, како одговор на рускиот напад врз Украина и предизвикот од активностите на Кина.
Сунак изјави дека Велика Британија долгорочно ќе ги подигне средствата за армијата на ниво од 2,5 отсто од бруто домашниот производ (БДП), наспроти сегашните нешто повеќе од два отсто.
Армијата бара воениот буџет да биде три проценти од БДП, според „АП“.
Дополнителните средства ќе бидат искористени за надополнување на резервите на муниција, исцрпени поради помошта за Киев, како и за договор со Соединетите Американски Држави и Австралија за изградба на атомски подморници.
