Судот во Истанбул нареди апсење на 20 осомничени, меѓу кои и неколку професионални фудбалери, како дел од проширената истрага за местење натпревари и обложување во турскиот фудбал.
Меѓу уапсените фудбалери се Мерт Хакан Јандаш од Фенербахче, Метехан Балтачи од Галатасарај и сенегалскиот интернационалец во редовите на Коњаспор, Аласане Ндао.
Јандаш (31) има еден настап за турската репрезентација, Балтачи (23) беше стандарден во турската селекција до 21 година, додека 28-годишниот Ндао има три настапи за Сенегал.
Турската фудбалска Федерација во ноември суспендираше 149 судии обвинети за вмешаност во обложување, а сегашните апсења следат по големата операција минатата недела во која 39 лица беа приведени под обвинение за нелегално обложување и местење натпревари.
