Индиската држава Керала денеска прогласи висок степен на тревога долж својот брег откако контејнерски брод што превезувал опасен товар потона во близина на брегот.
Бродот, под знаме на Либерија, пловел меѓу индиските пристаништа Вижинџам и Кочи кога, од сè уште непознати причини, потонал на околу 38 наутички милји (70 километри) од брегот на Керала во неделата наутро.
Сите 24 членови на екипажот се спасени, соопшти индиското Министерство за одбрана.
Бродот потонал со 640 контејнери, вклучувајќи 13 со неодреден „опасен товар“ и 12 што содржеле калциум карбид. Во неговите резервоари имало околу 84 тони дизел и 367 тони мазут.
Владата на Керала денеска ги повика луѓето да не се приближуваат до контејнерите што плутаат кон брегот. Исто така, им советуваше на рибарите да се оддалечат што подалеку од потонатиот брод.
Индиската крајбрежна стража соопшти дека испратила авион со систем за откривање на излевање на нафта за да ја испита областа. На местото на несреќата има и брод со опрема за контрола на загадувањето.
