Поранешниот американски претседател Доналд Трамп изјави дека одлуката на претседателот Џозеф Бајден да испорача касетна муниција во Украина ги вовлекува САД уште поблиску до Третата светска војна.
„Џо Бајден не треба да нè вовлекува во Трета светска војна испраќајќи касетна муниција во Украина, тој треба да се обидува да стави крај на војната, смртта и уништувањето, а сето тоа е вина на неспособната администрација“, рече тој.
Трамп додаде дека неексплодираната касетна муниција ќе убива невини Украинци во следните децении, долго по војната.
Покрај тоа, рече Трамп, Бајден треба особено да се обиде да ја деескалира кризата во Украина, откако призна дека на САД им снема артилериски гранати од 155 милиметри што и ги доставуваат на Украина.
САД секако не треба да испраќаат резерви во Украина во време кога, како што рече Бајден, нивните сопствени арсенали се намалуваат, рече Трамп.
Бајден изјави дека САД ќе и дадат касетна муниција на Украина на привремен период. Тој објасни дека се консултирал со американските сојузници и партнери за неговата одлука и дека тие ја разбираат причината.
