TikTok се врати кај корисниците во САД, барем засега. Иако многу корисници на апликацијата се воодушевени од оваа вест, експертите предупредуваат дека тоа не е добра вест за менталното здравје на милиони деца и тинејџери.
Џонатан Хајд, психолог од Универзитетот во Њујорк и автор на бестселерот „Вознемирена генерација“, посочува дека Американците треба да го поддржат укинувањето на ТикТок.
„Таа платформа предизвикува сериозна штета на децата, адолесцентите и младите возрасни“, напишаа Хајд и истражувачот Зак Рауш во неодамнешниот блог пост.
TikTok беше накратко блокиран во САД откако Конгресот усвои закон со кој се бара од кинеската компанија ByteDance да го продаде својот удел во апликацијата. Иако забраната е привремено одложена, Хајд и Рауш веруваат дека целосното исклучување на TikTok би било подобро за општеството.
Според нив, TikTok поттикнува „зависно, компулсивно и проблематично користење“ кај младите луѓе, ги изложува на несоодветна содржина и придонесува за зголемено ниво на анксиозност и депресија.
Од друга страна, TikTok тврди дека активно работи на заштита на помладите корисници. Платформата воведе алатки за контрола на времето поминато на апликацијата, безбедносни опции за родителите и ресурси прилагодени на помладата публика.
Тие исто така го истакнаа извештајот од 2021 година во кој се наведува дека активностите како што се поврзувањето со пријателите и учењето нови вештини може да имаат позитивни ефекти врз корисниците.
И покрај забраните, децата и тинејџерите често наоѓаат начини да пристапат до социјалните мрежи како Instagram и Snapchat.
Сепак, истражувањата покажуваат дека сите овие платформи носат психолошки ризици.
„Децата денес поминуваат многу помалку време со своите врсници и токму тоа е клучот за нивниот социјален развој“, предупредува Рауш.
