Генералот Есмаил Каани, командант на елитните сили „Ал Кудс“ во составот на Иранската револуционерна гарда, во ретко јавно обраќање го поздрави „новиот регионален поредок“ воспоставен преку дејствувањето на вооружените групи поддржани од Техеран.
Во пораката споделена на социјалните мрежи, Каани истакна дека желбата на „маченички убиените команданти“ е остварена преку создавање на единствен команден центар на фронтот на отпорот.
Тој конкретно ги спомена операциите на либанскиот Хезболах и јеменските Хути, нагласувајќи дека регионот мора да се навикне на новата реалност во која Техеран и неговите сојузници имаат доминантна улога.
Ова е само второ обраќање на Каани од почетокот на воената офанзива пред еден месец.
Иако неговиот профил на мрежата „Икс“ беше брзо блокиран, пораката беше масовно пренесена од иранските државни медиуми. Каани, кој го наследи Касем Сулејмани во 2020 година, подолго време е во илегала, што поттикна бројни шпекулации за неговата улога и локација по гласините за негова смрт во текот на минатата година.
