Министерот за здравство Арбен Таравари ја потврди тажната вест за смртта на шеесеттата жртва од трагичниот пожар во дискотеката „Пулс“ во Кочани.
Станува збор за пациент кој се лекувал во Литванија, а според информациите, бил еден од најкритичните. Имал 40% изгореници на телото и бил ставен на дијализа поради откажување на бубрезите.
– Утрово ја примивме веста дека пациентот кој се лекуваше во Литванија починал. Тој беше ставен на дијализа поради откажување на бубрезите на 1 април и имаше 40% изгореници на телото. Подолго време беше во критична состојба. Имаше инфекција поради огромната површина на раните на телото – изјави министерот Таравари.
Тој додаде дека има уште тројца до четворица пациенти кои се во исклучително тешка здравствена состојба и дека нивната состојба се следи внимателно.
– Се надеваме дека другите нема да завршат со фатален епилог – изјави Таравари.
