Неидентификуван цивилен дрон денеска бил соборен од војската на Тајван, пренесуваат агенциите.
Авионот влегол во воздушниот простор во близина на островче во близина на брегот на Кина, откако владата вети дека ќе преземе нови тешки мерки за да се справи со порастот на таквите упади.
Медиумите потсетуваат дека Пекинг кој го смета Тајван за своја територија, од почетокот на минатиот месец одржа воени вежби околу островот како реакција на посетата на Тајпеј на претседателката на Претставничкиот дом на американскиот Конгрес, Ненси Пелоси.
Од одбранбената команда на Кинмен, група острови контролирани од Тајван спроти кинеските градови Ксијамен (Ксиамен) и Куанжу (Кванжоу), во соопштението објавено од Министерството за одбрана на Тајван изјавиле дека дронот навлегол во ограничен воздушен простор.
Војниците на островите се обиделе да го предупредат, но безуспешно, па го собориле, а остатоците паднале во морето, се додава во соопштението што го пренесуваат агенциите.
