Високиот руски функционер Константин Косачев изјави дека заканите на американскиот претседател Доналд Трамп за 100-процентни царини не влијаат на ставот на Москва.
„Тоа воопшто не нè засега“, рече заменик-претседателот на горниот дом на рускиот парламент.
„Ако тоа е сè што Трамп кажа денес за Украина, тогаш целиот притисок испари“, додаде тој.
Косачев тврди дека Европа сега „ќе мора да плаќа сè повеќе и повеќе“, бидејќи „бесплатниот ручек се покажа како стапица за нив“. Тој, исто така, ги обвини САД дека се единствените вистински победници од новата политика, бидејќи американската воена индустрија има корист.
„Украина може да продолжи да се бори до последниот Украинец“, рече Косачев, заклучувајќи: „За 50 дена, колку може да се промени – и на бојното поле и во расположението на носителите на одлуки во САД и НАТО“.
Да ве потсетиме дека американскиот претседател Доналд Трамп денес изјави дека Соединетите Американски Држави ќе дистрибуираат воена опрема во вредност од милијарди долари во Украина и дека САД ќе воведат 100-процентни санкции кон Русија доколку не се постигне договор за примирје во војната во рок од 50 дена.
