Интер ја оствари четвртата последовна победа во Серија А, вкупно осмата од почетокот на сезоната, совладувајќи ја Сампдорија на „Џузепе Меаца“ со 3:0. Тренерот на гостите, Дејан Станковиќ, доби овации при враќањето во Милано, со оглед дека беше дел од генерацијата на Интер која освои тројна круна заедно со Горан Пандев, но Интер сепак не му прости на неговиот тим.
„Нероаѕурите“ славеа убедливо. Стефан де Фрај во 21.минута го отвори резултатот со одличен удар со глава, а пред крајот на првиот дел Николо Барела со фантастичен шут зголеми на 2:0. Третиот гол беше дело на Хоакин Кореа во 73.минута од дуелот.
