Министерот за одбрана Милош Вучевиќ денеска изјави дека припадниците на вооружените сили на Србија се распоредени на позиции кон административната линија и дека Србија нема да дозволи нова „Бура“.
„Нешто пред 14 часот, началникот на Генералштабот на вооружените сили на Србија издаде дополнителни наредби единиците на српските вооружени сили да заземат одредени позиции кои беа дефинирани во согласност со нашите одбранбени планови, стратешки планови, а исто така и оперативни и тактички акции на српските вооружени сили, се со цел да се заштити суверенитетот на Република Србија и нејзините граѓани“, изјави Вучевиќ за РТС.
Министерот за одбрана Милош Вучевиќ потврди дека Вучиќ ја потпишал наредбата за зголемување на борбената готовност и додаде дека ситуацијата на Косово е драматична.
„Сето она што претседателот Вучиќ со денови и недели предупредуваше дека Приштина брза понатаму во ескалацијата и спроведувањето терор врз српската заедница, пред се на северот на Косово, и го привлече вниманието на меѓународната заедница и посредниците во дијалогот меѓу Приштина и Белград, за жал, се покажа дека е вистина“, изјави Вучевиќ за ТВ Пинк.
„Некој мора да разбере дека она што го прави Албин Курти нè води кон црвени линии, нè води до целосен колапс на дијалогот, нè води до деескалација на теренот“, рече Вучевиќ.
Рече дека Министерството за одбрана, односно вооружените сили на Србија, ќе ја спроведат наредбата на претседателот и ќе го направат она што се очекува од вооружените сили на Србија да бидат онаму каде што е најтешко да се бранат слободата и независноста на Србија.
Министерот им порача на Србите на Косово, колку и да е ситуацијата драматична и тензична, треба да бидат максимално мирни, во смисла да не наседнуваат на провокации, да не дозволат да се игра сценарио каде би биле прикажани како некои криминални групи или хулигани, бидејќи според него, е јасно дека се врши институционален терор на територијата на Косово врз српската заедница.
„Тие сакаат да го спроведат етничкото чистење до крај, пред сè, на компактната српска заедница на северот на Косово“, рече Вучевиќ.
Изјави дека припадниците на вооружените сили на Србија се распоредени на позиции кон административната линија, како и дека Србија нема да дозволи нова „Бура“.
„Нема да се повтори 17 март 2004 година. Нема да ги земете преостанатите Срби и да ги ставите во трактори и да ги испратите во централна Србија. Ако тоа е целта, а според мене тоа е, мора да знаете дека Србија ќе најде адекватен одговор, пред се политички, и не исклучувам ниту еден друг одговор кој ќе биде адекватен на опасноста што и се заканува на нашата земја и на нашите граѓани, секако имајќи предвид дека го чуваме мирот речиси по секоја цена“, рече Вучевиќ.
Тој додаде дека Белград е во постојана комуникација со КФОР и меѓународните посредници и дека врши политички и дипломатски притисок сите да се вразумат.
