Едвард Сноуден доби руски пасош откако се заколна на верност на земјата која го штити од американските власти од 2013 година. Веќе во септември оваа година, Сноуден доби руско државјанство со декрет потпишан од рускиот претседател Владимир Путин.
Информацијата дека 39-годишниот шпион го добил пасошот денеска ја потврди и неговиот адвокат Анатолиј Кучерена.
„Тој положи заклетва“, рече Кучерена и додаде дека Сноуден е среќен бидејќи неговото руско државјанство ја спречува неговата екстрадиција, пренесува „Гардијан“.
„ Се разбира, тој е среќен и благодарен на Руската Федерација за неговото државјанство, тој сега е полноправен државјанин на Русија. И што е најважно, според рускиот устав, тој не може да биде предаден на странска земја”, рече адвокатот на Сноуден. Не се објавени фотографии или снимки од церемонијата.
Поединците кои добиваат руско државјанство со закон се обврзуваат да „го почитуваат уставот и законодавството на Руската Федерација, правата и слободите на нејзините граѓани, да ги исполнуваат должностите на државјанин на Руската Федерација во корист на државата и општеството, да ја заштитат слободата и независноста на Руската Федерација, да бидат лојални на Русија и да ја почитуваат нејзината култура, историја и традиција“.
Според информациите, и сопругата на Сноуден поднела барање за руско државјанство. Двајцата живеат на непозната локација со нивните два сина, кои се родени во Русија.
„По години разделба од нашите родители, јас и мојата сопруга немаме желба да се разделиме од нашите синови. По две години чекање и речиси 10 години егзил, малку стабилност значи многу за моето семејство. Барам приватност за нив и за сите нас“, напиша Сноуден во септември.
