Во кумановско Слупчане колективниот отпор за влез на екипите од ЕВН во селото трае, додека за компанијата, Арачиново е успешна приказна каде се модернизирала целата мрежа. Од ЕВН посочуваат дека имаат и индивидуални отпори при постапување на нивните вработени, додека овие како во Слупчане се ретки. Посочуваат дека сите вакви ситуации успешно ги надминуваат. На скоро сите локации каде има отпор, има и кражби на струја.
„Индивидуалните кражби секогаш се утврдуваат на терен, односно на лице место и се пријавуваат во МВР“, велат од ЕВН за „Макфакс“, додека на прашањето дали имаат асистенција од полицијата во Слупчане, тие додаваат: „Контуинирано ги известуваме МВР и добиваме одлична подршка. Министерот е лично ангажиран за брзо изнаоѓање на решенија во вакви ситуации“.
Во скопско Арачиново, екипите на ЕВН веќе работат на модернизација на мрежата. И во ова место имаше организирани жители кои не пуштаа претставници на селото да влезат и дојдат до системот за напојување.
„Во моментот нема проблеми. Имаме одлична подршка од градоначалникот и од сите надлежни институции. Денеска го завршуваме проектот во целото село и наскоро ќе излеземе со подетална информација за оваа успешна приказна. Пред започнување на проектот за реконструкција минатата година, кражбите во Арачиново изнесуваа 80%. Проектот е во завршна фаза и очекуваме загубите да бидат околу 10%“, додаваат од ЕВН за „Макфакс“.
Од компанијата посочуваат дека успешни проекти се веќе спроведени или се спроведуваат во најголемиот дел од Липковскиот регион, Арачиново, Грчец и други локации во општина Сарај, Визбегово, Сингелиќ, Равен, Гостивар, Прилеп, Битола.
