По новиот пораз на Интер, во клубот има кризна ситуација, а следува куп дуелот со Јувентус. Италијанските медиуми веќе ја „бараат главата“ на Симоне Инзаги, а серијата лоши резултати го ставија Интер во ситуација да стравува за Лигата на шампионите.
Колку лошо игра Интер, доказ е тоа што Јувентус има само шест бода помалку, иако е казнет со одземање на 15 бода.
Во секој случај, Инзаги има уште малку време на располагање. Се шпекулира дека клучните натпревари, покрај веќе споменатиот против Јувентус во Купот на Италија, се следниот викенд и гостувањето во Салерно, а потоа и пресметката во ЛШ против Бенфика. Доколку нема подобрување, клубот нема да чека и ќе го смени Инзаги.
Нема простор за шпекулации дека големо тренерско име би можело да седне на клупата во овој момент од сезоната.
Најверојатно клубот ќе се одлучи за внатрешно решение. Естебан Камбијасо има лиценца, но Аргентинецот наводно нема да прифати да ја чува клупата за некој друг. Затоа пак Кристијан Киву е расположен да ја преземе. Романецот работи во младинската школа, има лиценца и би можел да ја заврши сезоната како тренер на сениорскиот тим.
