Министерот за надворешни работи на новата полска, проевропска влада Радек Сикорски изјави дека неговата земја нема да се откаже од барањето Германија да им плати воени репарации.
Полскиот министер, на заедничката прес-конференција во Берлин со неговата германска колешка Аналена Бербок, рече дека би сакал германските функционери да размислуваат на „креативен“ начин за надоместување на Полска за огромните загуби што земјата ги претрпе за време на Втората светска војна.
„Ќе побарам од министерката да ја убеди германската влада да размислува на креативен начин за изнаоѓање форма на компензација за тие воени загуби“, рече Сикорски, без да даде повеќе детали.
Бербок, пак, рече дека „справувањето со страдањата на милиони луѓе што Германија ги предизвика во Полска останува вечна задача“, но таа директно не се осврна на барањето за обесштетување.
Побарувачката, сепак, е значително намалена од онаа на претходната десничарска влада на Полска, која бараше 1,3 милијарди евра репарации за инвазијата и окупацијата од 1939 до 1945 година.
Германските власти, од друга страна, сè уште остануваат на ставот дека прашањето за репарации е решено пред неколку децении, иако Берлин ја признава својата историска одговорност. За време на нацистичката окупација, Полска загуби околу шест милиони свои граѓани, од кои половината беа Евреи. Земјата претрпе огромни штети и во однос на индустријата, инфраструктурата и културното наследство.
