Зоолошката градина во Штип станува една од најмодерните во земјата. Градоначалникот Јорданов најави проширување на капацитетите и нови животински видови кои ќе бидат вистинска атракција за посетителите.
ЗОО паркот „Бриони“ во Штип оваа пролет ќе добие значително освежување. Како дел од планот за проширување на капацитетите, пред празникот Велигден во паркот ќе пристигнат шест нови видови животни:
Лемури и коати (кои се меѓу омилените за децата);
Бодликави и виетнамски прасиња;
Волк и елегантен лебед.
Градоначалникот на Општина Штип, Иван Јорданов, денеска изврши увид во градежните активности на ЈП „Исар“, чии екипи работат на изградба на нови, современи живеалишта и кафези за новите жители.
„Навистина ми е драго што овој парк прераснува во еден од најубавите во нашата држава, веднаш до скопската и битолската зоолошка градина. Со секоја измината година ги зголемуваме капацитетите и воведуваме нови животни, создавајќи катче каде граѓаните од целиот регион ќе можат квалитетно да го поминат своето слободно време“, изјави Јорданов.
Ова збогатување на животинскиот фонд доаѓа по успешната адаптација на двете ему птици и гривестиот мајмун, кои претходно беа донесени во Штип. Со новите содржини, „Бриони“ се етаблира како примарна дестинација за семејни прошетки и едукација на младите во Источна Македонија.
