Шпанија се подготвува за третиот топлотен бран ова лето, кој ќе започне во вторник, а се очекува температурите да надминат 40 степени Целзиусови во поголемиот дел од земјата, соопшти шпанската метеоролошка агенција АЕМЕТ. Топлотниот бран ќе биде засилен од антициклон кој ќе го зароби сувиот воздух од Северна Африка над Шпанија неколку дена, зголемувајќи ги температурите на исклучително високи нивоа, соопшти АЕМЕТ.
Се очекува топлотниот бран да се влоши до четврток, кога се предвидува дека ќе достигне врв, а температурите веројатно ќе надминат 45 степени Целзиусови во некои изолирани области. „Нивото на опасност ќе биде значително во најжешките часови од денот, особено за активности на отворено и ранливи групи“, предупреди метеоролошката служба.
Најтоплиот почеток на летото откако се водат евиденции
Шпанија веќе се соочи со два топлотни бранови ова лето, едниот кон крајот на јуни кога беа срушени температурни рекорди низ цела Европа, а другиот на почетокот на јули. Шпанија се соочи со најжешкиот почеток на летото откако почнаа да се водат мерења во 1961 година, соопшти АЕМЕТ во вторник.
Просечната температура помеѓу 1 јуни и 15 јули била 24,5 степени Целзиусови, што е за 3,3 степени повисока од просекот од 21,2 степени во периодот 1991-2020 година, изјави за АФП портпаролот на AEMET, Рубен дел Камбо.
Според научниците, климатските промени предизвикани од човекот го зголемуваат времетраењето, интензитетот и фреквенцијата на топлотните бранови што ја сушат вегетацијата и го зголемуваат ризикот од шумски пожари. Во пожар што избувна во југоисточната шпанска покраина Алмерија во јули загинаа 13 лица.
