Германија е подготвена за водечка воена улога за да ја обезбеди безбедноста на Европа, изјави денеска германскиот канцелар Олаф Шолц.
Говорејќи на воената конференција во Берлин, Шолц рече дека рускиот напад врз Украина бил пресвртница во историјата, предизвикал промена на парадигмата во безбедносните работи и направил неопходно Германија да ја зајакне својата војска, јавија тамошните медиуми.
Тој посочи дека Германија е најнаселената земја во ЕУ и најголемата економија, тврдејќи дека германските вооружени сили (Бундесвер) треба да станат „најдобро опремената армија во Европа“.
„Германија е подготвена да преземе водечка улога, да преземе одговорност за безбедноста на нашиот континент“ – рече Шолц и се обиде да ги увери соседните земји во плановите на Берлин.
Тој рече дека „европските пријатели и партнери не треба да ја гледаат оваа цел како закана“.