Високи претставници на Северна Кореја и Кина се заложија за натамошно продлабочување на билатералната соработка, оценувајќи дека промените во меѓународното политичко опкружување бараат уште потесно единство меѓу двете земји, јави денеска севернокорејската државна новинска агенција КЦНА.
Членот на Президиумот на Политбирото на владејачката Работничка партија на Северна Кореја, Џо Јонг-вон, за време на разговорите со високиот кинески функционер Ванг Хунинг во Пјонгјанг изјави дека развојот на глобалната политичка ситуација ги поттикнал двете држави дополнително да ја зацврстат меѓусебната поврзаност.
Ванг, член на Постојаниот комитет на Политбирото на Комунистичката партија на Кина и близок соработник на кинескиот претседател Си Џинпинг, престојува во тридневна посета на Северна Кореја по повод 65-годишнината од Договорот за меѓусебна помош, потпишан меѓу двете земји.
Според КЦНА, Ванг изјавил дека договорот претставува правна основа за зацврстување на „пријателството создадено со крв“, потсетувајќи дека двете земји се бореле заедно за време на Корејската војна (1950–1953 година). Северна Кореја останува единствениот формален сојузник на Кина со кој има договор за меѓусебна одбрана.
Кинеските државни медиуми засега не објавија повеќе детали од средбата, освен информацијата за посетата.
Посетата на Ванг следува по јунската посета на Си Џинпинг на Северна Кореја, кога тој и севернокорејскиот лидер Ким Џонг-ун најавија отворање „ново поглавје“ во билатералните односи.
Кина и натаму е најважниот трговски партнер и дипломатски поддржувач на Северна Кореја.
Во последните години Ким Џонг-ун значително ја прошири севернокорејската нуклеарна програма и ја интензивираше воената соработка со Русија. Од почетокот на руската инвазија врз Украина во 2022 година, Пјонгјанг испорача муниција и артилериски гранати за Москва, а испрати и до 15.000 војници како поддршка на руските сили.
