Руската Федерална служба за безбедност (ФСБ) соопшти дека спречила заговор на украински и британски разузнавачи да убедат руските пилоти за три милиони долари да украдат авион „МиГ-31“, вооружен со хиперсонична ракета „Кинџал“, објавија државните медиуми.
Руските медиуми го цитираат ФСБ дека таргетираниот авион требало да биде пренасочен кон воздухопловната база на НАТО во романскиот град Констанца, каде што би можел да биде соборен од воздушната одбрана.
ФСБ, главниот наследник на КГБ од советската ера, вели дека Украина и Велика Британија планирале голема „провокација“ користејќи го таргетираниот авион и дека украинското воено разузнавање се обидело да ги натера руските пилоти да го украдат авионот за три милиони долари.
„Преземените мерки ги спречиле плановите на украинските и британските разузнавачки служби за голема провокација“, наведуваат претставници на ФСБ.
Државната телевизија емитуваше фотографии од пораки и снимки од човек кој, како што се наведува, работел за украинските и британските служби и му понудил три милиони долари на руски пилот за да лета со „МиГ“ до Европа, а дека на пилотот му било понудено и државјанство.
Руската ракета „ Кинџал“ е балистичка ракета лансирана од воздух што Москва ја нарекува хиперсонична, способна за големи брзини и маневрирање на патеките на летот за да им го отежни следењето и пресретнувањето на воздушната одбрана.
Русија долго време ја смета Велика Британија за свој главен непријател. Москва го обвинува Лондон за поттикнување на војната во Украина, а британските разузнавачки служби за помагање на Украина да започне серија операции длабоко на руска територија.
Велика Британија ја смета руската инвазија на Украина за империјална узурпација на земјата. Лондон постојано предупредува дека руските разузнавачки агенти се обидуваат да посеат хаос низ Велика Британија и Европа со цел да ја поткопаат демократијата.
