Русија денес започна обемни поморски маневри во кои учествуваат повеќе од 150 пловила и 15.000 војници, лоцирани во водите на Тихиот и Арктичкиот океан, како и во Балтичкото и Каспиското Море, извести руското Министерство за одбрана.
Вежбата „Бура“, закажана за јули и планирана да трае до 27 јули, има цел да ја оцени подготвеноста на морнарицата за нестандардни акции, употреба на оружје со голем дострел и други современи системи, вклучувајќи и беспилотни летала, се наведува во соопштението на Министерството за одбрана.
„Екипажите на бродовите ќе вежбаат распоредување во борбени зони, борба против подморници, заштита на базирачките области и економски активности“, соопшти руското Министерство за одбрана.
Во рамките на вежбите ќе биде симулирано и „одбивање напади од непријателски воздушни напаѓачки возила, беспилотни чамци и дронови, обезбедување безбедност на бродовите, погодување непријателски цели и бродски групи“.
Во овие воени маневри, предводени од адмиралот Александар Мојсеев, учествуваат и над 120 летала, 10 крајбрежни ракетни системи и 950 единици воена и специјална опрема.
