Руските власти утринава соопштија дека во текот на ноќта собориле 162 украински беспилотни летала, повеќето од нив во Курскиот и Белгородскиот регион, на границата со Украина, во време кога денеска во Истанбул треба да започнат нови директни разговори меѓу Русите и Украинците.
„Системите за воздушна одбрана пресретнаа и уништија 162 украински дронови“ синоќа помеѓу 17:10 и 23:00 часот по средноевропско време, соопшти руското Министерство за одбрана.
Беспилотните летала главно ги таргетирале Курскиот регион (57) и Белгородскиот регион (31), се додава во соопштението.
Ова се случува во време кога руските и украинските делегации треба денеска повторно да се сретнат во Истанбул, при што перспективата за крај на конфликтот од руската инвазија на Украина во февруари 2022 година изгледа далечна.
Пред долгоочекуваните разговори, Украина во неделата започна координиран напад со беспилотни летала во голем обем врз воените аеродроми во Русија, дури до Сибир, а Москва подоцна потврди дека неколку од авионите „се запалиле“.
Украина редовно испраќа беспилотни летала во Русија како одговор на секојдневните воздушни напади на нејзина територија.
