Околу 419 илјади луѓе ја напуштиле Русија во првата половина на 2022 година, двојно повеќе од претходната година, објави руската новинска агенција РБЦ.
Тоа е и првиот период во поновата руска историја каде емиграцијата е поголема од имиграцијата. Руската статистичка агенција „Росстат“ не соопшти детали за националноста на оние кои ја напуштиле земјата.
Русија традиционално привлекува имигранти од поранешните советски републики. Годинава движењето на населението отиде во друга насока – околу 369 илјади луѓе отидоа во поранешните советски држави, а од нив во Русија влегоа 295 илјади луѓе. Речиси 80 илјади луѓе ја избрале Украина за своја дестинација.
