Регионалниот суд во рускиот град Свердловск го прогласи за виновен дописникот на „Волстрит џорнал“ Еван Гершкович и го осуди на 16 години затворска колонија со максимална безбедност заради шпионажа, пишува РИА Новости.
Државното обвинителство побара 18 години затвор за Гершкович. Судот почна да ја разгледува основаноста на случајот на Гершкович на 26 јуни. Само две седници, кои се одржаа зад затворени врати, беа потребни за да се заврши судењето. Пресудата не е правосилна.
Според истрагата, Гершкович „на задача од ЦИА, собрал тајни информации за активностите на одбранбеното претпријатие ‘Уралвагонзавод’ за производство и поправка на воена опрема“. Новинарот го негира тоа и не ја признава вината.
Гершкович беше уапсен во Екатеринбург и префрлен во истражниот затвор Лефортово во Москваод крајот на март 2023 година. Тој стана првиот американски новинар кој е приведен во Русија под обвинение за шпионажа од 1986 година. Прес секретарот на рускиот претседател Дмитриј Песков рече дека Гершкович бил „фатен на дело“.
Американските власти го нарекоа неговото апсење незаконско. Американскиот претседател Џо Бајден изјави дека е сериозен во врска со размената на Гершкович. Рускиот заменик-министер за надворешни работи Сергеј Рјабков рече дека ова прашање може да се разгледа само по пресудата.
На почетокот на февруари, рускиот претседател Владимир Путин изјави во интервју за американскиот новинар Такер Карлсон дека руските власти би можеле да го ослободат Гершкович доколку има „контра движење“ од „западните партнери“.
