Во април, Русија беше најголемиот снабдувач на сурова нафта во Кина 12-ти месец по ред, при што обемот на испораките се зголеми за 30 отсто во споредба со април минатата година, покажуваат денеска објавените податоци од кинеската Генерална царинска управа. Кинескиот увоз на сурова нафта од Русија, кој вклучува снабдување преку нафтоводи или по море, во април изнесува 9,26 милиони метрички тони, или 2,25 милиони барели дневно (bpd), покажуваат податоците на главната царинска управа.
Од почетокот на оваа година, кинескиот увоз од Русија е зголемен за 17 отсто во споредба со истиот период минатата година, на 37,79 милиони тони или приближно 2,28 милиони барели дневно, што претставува 21 отсто од вкупниот увоз на најголемиот светски увозник на сурова нафта.
Според податоците на царинската управа, увозот од Саудиска Арабија, која во април минатата година беше најголемиот снабдувач на Кина, е намален за четвртина во однос на истиот период лани, на 6,34 милиони тони или 1,54 милиони барели дневно, во услови на повисоки цени. Имено, Саудиска Арабија ја зголеми априлската продажна цена на нафтата за Азија на 1,70 долари за барел, од претходните 1,50 долари.
Увозот од Малезија, клучен центар за претовар на нафта од Иран и Венецуела и четврти по големина извор на увоз, остана главно рамномерен во текот на годината со околу 980.000 барели дневно.
Последните податоци на царинската управа, исто така, покажаа дека Кина увезла 0,19 милиони тони нафта од Венецуела, со што нејзиниот обем на увоз од година до денес изнесува 0,92 милиони тони, или 55.000 барели дневно, под влијание на привременото олеснување на американските санкции на Каракас.
