Рекорден број од речиси 2.000 антисемитски инциденти се случиле во Велика Британија во првата половина од оваа година, објави невладина организација.
Фондацијата за безбедност на заедницата (CST) соопшти дека 1.978 инциденти од јануари до јуни се двојно повеќе од бројот во истиот период минатата година (964) и највисокиот вкупен број пријавени во првата половина од годината.
Министерката за внатрешни работи Ивет Купер ги нарече нивоата на омраза „навистина ужасни“, јави ДПА.
Организацијата, која го следи антисемитизмот и е задолжена за безбедност за еврејската заедница во Британија, рече дека реторика или слики поврзани со Израел, Газа, нападот или војната на Хамас се појавиле во повеќе од половина од регистрираните инциденти -1.026.
Главниот извршен директор на CST, Марк Гарднер, ги опиша бројките како „срамен пораст на британскиот антисемитизам“. „Ова се случува низ целото општество, вклучувајќи ги училиштата, кампусите, работните места, јавниот превоз и на улиците“, рече тој.
„Ние имаме на ум дека, иако таквата омраза може прво да ги таргетира Евреите, таа брзо се свртува и кон другите. CST ќе продолжи со својата цврста заштита на нашите британски еврејски заедници“, рече Гарднер.
