Министерството за внатрешни работи спроведе опсежна акција во Кочани, при што беше извршен претрес во домот на Дејан Јованов, познат како Деко, неговото возило „Инсигниа“ и два угостителски објекти – дискотеката „Пулс“ и кафе-барот „Класик“.
Запленети електронски уреди и финансиска документација
Покрај претресите во неговиот дом и локали, полициските службеници влегоа и во канцеларијата на Државниот пазарен инспекторат (ДПИ) во Кочани, каде што пребаруваа документација поврзана со фирмите во сопственост на Јованов.
„Во домот на Д.Ј. пронајдени и одземени се лаптопи, повеќе мобилни уреди, документација и други предмети. Одредени предмети се одземени и од возилото, како и од угостителските објекти. Пронајдена и одземена е и финансиска документација. Во канцеларијата на ДПИ – Кочани, одземени се компјутер, лаптоп, таблет и целокупната документација поврзана со правните субјекти на Д.Ј.“, соопштија од МВР.
Испитување на неговото семејство
Полицијата вчера повика на распит и неговата сопруга и ќерка, а во тек е анализа на собраните докази.
Кафе-барот „Класик“, кој беше цел на претресот, беше демолиран за време на протестите што се случија ден по трагичниот пожар во Кочани, во кој загинаа 59 лица, а над 150 беа повредени. Истражните органи продолжуваат со проверките за потенцијална поврзаност на Јованов со одредени нерегуларности или незаконски активности.
