Во касарната „Страшо Пинџур“ во Петровец, Првата пешадиска бригада (1.пбр) од составот на Командата за операции (КО), која е најголемата борбена единица во Армијата, денеска го одбележа Денот на единицата.
На свеченоста присуствуваа министерот за одбрана Владо Мисајловски, началникот на Генералштабот генерал-мајор Сашко Лафчиски, генерали во Армијата, пратеници, поранешни команданти, воени аташеи, претставници на локалната самоуправа и други гости.
Командантот на Командата за операции, бригаден генерал Мирче Ѓоргоски, во своето обраќање истакна дека оваа единица е столбот на воените традиции и пример за високите стандарди во обуката и оперативната способност, особено во контекст на петгодишното членство во НАТО.
Командантот на 1.пбр, бригаден генерал Дејан Чиплаковски, нагласи дека бригадата е примарен капацитет за исполнување на обврските од членството во НАТО и додаде: „Нашата посветеност кон НАТО останува непоколеблива, затоа што тоа е вистинскиот пат“.
На настанот беа доделени НАТО медали на припадниците кои учествувале во мировни мисии, стимулативни мерки за најистакнатите припадници, а за најдобра единица во бригадата беше прогласена втората чета од 2. пешадиски баталјон.
Претседателот и врховен командант на Армијата го прогласи 2 април за Ден на 1.пбр, како датум на кој оваа единица ги презеде задачите на двете поранешни бригади, станувајќи најголемата борбена единица во Армијата на Република Северна Македонија.
Првата пешадиска бригада обезбедува готови сили за заштита на националните интереси, помош при природни катастрофи, епидемии и други непогоди, како и учество во меѓународни операции под водство на НАТО, ОН и ЕУ.
