Утринава на Водно е забележана првата мала снежна покривка, проследена со магла. Од камерите поставени од Јавното сообраќајно претпријатие „Скопје“ се гледа дека на врвот има снег, а снежни наноси се забележани и во некои зимски туристички центри. Поради овие наноси, на патниот правец Кратово – Пробиштип е воведена забрана за движење на тешки моторни возила, соопштува Автомото сојузот на Македонија (АМСМ).
Забраната за движење е воведена од 7 часот, додека сообраќајот на останатите државни патишта се одвива непречено, но со претежно влажни коловози. Јавното претпријатие „Македонија пат“ информира дека на патните правци низ клисури и усеци е можно присуство на поситни одрони, поради што апелираат на внимателно возење и почитување на сообраќајната сигнализација.
