Просечната пензија за декември во Србија ќе биде зголемена за 12,2 проценти и ќе изнесува околу 56.860 динари, односно 485 евра. Директорот на Српскиот фонд за пензиско и инвалидско осигурување (ПИО), Реља Огњеновиќ потенцираше дека ќе биде поголема за околу 6.000 динари.
Тој за најновото издание на „Гласот на осигурениците“, билтенот на Фондот ПИО, изјави дека Фондот ќе се обиде да ги исплати зголемените пензии на сите корисници веќе во првите работни денови по Нова година.
„Овој метод на прилагодување е најповолен за корисниците. Благодарение на растот на БДП од јули 2024 до јуни 2025 година, учеството на нето пензиите во БДП е помало од 10 проценти, а со примена на формулата за прилагодување од Законот за ПИО, се добива процент од 12,2 проценти“, истакна тој.
Додаде дека фондот ги обезбедил парите за исплата на зголемени пензии со финансискиот план за 2026 година.
