Евгениј Пригожин, шеф на руската платеничка формација Вагнер, изјави дека неговите војници изгубиле повеќе од 20.000 луѓе во исцрпувачката битка за градот Бахмут во источна Украина.
Тој изјави дека околу половина од загинатите биле регрутирани осуденици на кои им била ветена слобода доколку се согласат да се борат.
Пригожин рече и дека руските сили убиле цивили за време на војната во Украина, што Москва жестоко го негира.
Во интервјуто со политичкиот стратег Константин Долгов, Пригожин оцени дека руската цел за „демилитаризација“ на Украина пропаднала бидејќи украинската армија станала посилна поради оружјето што го добива од Западот.
Тој, исто така, оцени дека очекуваната контраофанзива на украинската армија, со оглед на континуираната поддршка од Западот, може да доведе до туркање на руските трупи од југот и истокот на Украина, вклучувајќи го и Крим, кој беше анектиран од Русија во 2014 година. Податоците за загубите на Вагнер се во остар контраст со податоците на официјална Москва дека Русија загубила само 6.000 војници од почетокот на 15-месечната војна до јануари оваа година.