Голем пожар изби меѓу штипските села Долани и Љуботен. Според првичните информации зафатена е поголема површина шума. На терен од 15 часот се повикани сите штипски пожарникари.
Благодарение на брзата реакција и помошта од локалното население, кое со трактори изорало заштитни појаси, огнот од страната кон селото Долани е ставен под контрола и изгаснат, со што е спречена опасноста од негово ширење кон куќите. Ситуацијата во Долани е смирена, пожарот во моментов се шири во правец кон селото Љуботен. Горат сува трева, нискостеблеста вегетација и борова шума, што го отежнува гаснењето поради непристапниот терен и ветерот.
При гаснењето на пожарот, едно лице се здобило со минимални изгореници. Екипите на Итната медицинска помош веднаш реагирале и му укажале соодветна лекарска помош.
Според последните информации од теренот, нема други повредени лица, а надлежните служби остануваат целосно мобилизирани до целосно изгаснување на огнот.
