Лидерот на „Преродба“ Костадин Костадинов на брифинг во Варна денеска за бугарските медиуми изјави дека според него повторно нема да се формира влада бидејќи тоа ќе доведе до тешки изборни последици за партиите учеснички во таквата влада.
„Ниту ГЕРБ нема да биде поштедена, бидејќи, верувајте, колку и да се контролира гласот во оваа партија, сепак има дел од луѓето кои не сакаат да си имаат работа со групација како коалицијата Сорос-Донос. Во овој конкретен случај, има две опции – или ќе извршат групно политичко самоубиство од големи размери, што е без преседан во нашата понова историја, или ќе одиме на нови избори“, рече Костадинов, а пренесува бугарсиот печат.
Костадинов повтори дека поради буџетскиот дефицит што го зацрта преодната влада, Бугарија нема да биде примена во еврозоната.
„Со овој дефицит треба да заборавиме на секаков влез во еврозоната во следните неколку децении. Тоа се егзотични, штетни идеи и што е најважно, експерименти со многу тешката состојба на јавните финансии во земјата“, рече Костадинов.
