Повеќе од 70 пациенти денеска направија ЕХО и уролошки прегледи во Специјализираната болница „13 Ноември“ – Скопје, во рамки на акцијата по повод Мовембер – месецот на машкото здравје.
Урологот д-р Дарко Костовски од ГОБ „8 Септември“ апелира дека мажите, особено оние над 50 години, треба редовно еднаш годишно да прават уролошки прегледи, кои вклучуваат ЕХО и туморски маркери за простата. Кај лица со семејна историја на заболувања, проверките се препорачуваат од 45 години, па и порано.
Директорката на болницата „13 Ноември“, Ленче Нелоска, истакна дека акцијата има цел да ја подигне свеста кај мажите кои ретко одат на уролог, и дека навремената контрола може да спречи сериозни последици. Акцијата ја поддржа и градоначалникот на Општина Карпош, Сотир Лукровски, кој порача дека превенцијата е клучна. Како предупредувачки симптоми се издвојуваат крв во урина, болка при седење и зголемена потреба за мокрење.
