Полските пратеници денеска усвоија закон со кој се воведува казна затвор до пет години за онлајн пренос на кривични дела како што се силување и убиство, како и за прикажување суровост кон животни, промовирање коцкање, лажно претставување, извршување кривични дела и понижување на други лица.
Овој потег е дел од пошироките напори на Полска за заострување на регулацијата на онлајн содржините. Неодамна усвоените мерки предвидуваат забрана за користење мобилни телефони во училиштата за деца помлади од 16 години, како и построги правила за проверка на возраста при пристап до порнографски содржини.
Одредбите усвоени денеска ќе го третираат емитувањето на кривични дела како посебно кривично дело казниво со затвор до пет години.
Законот опфаќа и содржини што прикажуваат суровост кон животни, насилство насочено кон понижување на други лица и промоција на коцкање. Истите казни ќе важат и за лица кои симулираат или лажно прикажуваат извршување на такви кривични дела за време на пренос во живо.
Европската Унија, чија членка е Полска, преку Законот за дигитални услуги (ДСА) ги регулира нелегалните интернет-содржини и кривичните дела што се пренесуваат во живо, барајќи од платформите брзо да отстрануваат материјали што промовираат насилство. Сепак, санкционирањето на авторите на таквите содржини се разликува од земја до земја.
