Полска денеска отстрани четири споменици на војниците на Црвената армија, изјави директорот на државниот историски институт Карол Навроцки, наведувајќи дека тие претставуваат остатоци од системот кој е виновен за поробување и убивање на својот и на другите народи, вклучително и Полјаците.
„Тоа се споменици на срамот, споменици на презир на победникот над жртвите“, рече Навроцки во Глубчице на југот на Полска, каде беше урнат еден од спомениците.
Тој додаде дека Советите не донеле ослободување на Полска, туку заробеништво, пренесува АП.
Во Глубчице беа уништени обелисци посветени на војниците на Црвената армија кои паднаа во битка со нацистичките трупи во 1945 година, а други споменици беа отстранети од Бичин, Боболица и Сташов.
Од отфрлањето на комунистичкото владеење во 1989 година, Полска активно работи на отстранување на јавните симболи на рускиот комунистички режим, а војната во Украина дополнително придонесе за забрзување на тој тренд.
