Министерството за правда го подготви Предлог-законот за судска служба, кој веќе е објавен на ЕНЕР и е отворен за јавни коментари. Согласно Реформската агенда, донесувањето на законот се очекува до јуни 2025 година.
Изработката на законот се темели на препораките содржани во домашни и меѓународни извештаи, како и во Стратегијата за човечки ресурси во судската служба. Целта е унапредување на статусот на судската служба и зајакнување на нејзината независност.
Една од клучните новини во Предлог-законот е изземањето на судските службеници од категоријата на административни службеници, со што се регулира нивниот правен статус и се признава спецификата на нивната улога во правосудниот систем.
Законот предвидува и воведување на систем за управување со ефектот на судските службеници, дефинирање работни цели и индивидуални планови за стручно усовршување, како и транспарентна постапка за оценување на ефективноста.
Дополнително, се интервенира во одредбите за висината на платите, со цел привлекување, мотивирање и задржување на стручни кадри во судската служба. Се предвидува и нов начин на регрутација преку ефикасни и транспарентни механизми.
Ова законско решение одговара на долгогодишните барања на синдикатите и претставува значаен чекор кон изградба на ефикасна, професионална и мотивирана судска служба, која ќе обезбедува висококвалитетни јавни услуги.
Граѓаните и заинтересираните страни имаат можност да дадат свои коментари, предлози и сугестии преку платформата ЕНЕР, пред законот да влезе во понатамошна процедура.
