Седумдесетгодишен маж од скопската населба Аеродром починал викендов од западнонилска треска на Клиниката за инфективни болести во Скопје.
Пациентот повеќе од 50 дена се лекувал на Клиниката, но и покрај лекарските напори, починал како последица на болеста.
Со овој случај, бројот на починати од западнонилска треска досега се искачи на 10 лица.
Според директорот на Клиниката за инфективни болести, Фадил Цана, во моментов се хоспитализирани седум пациенти со западнонилска треска, од кои двајца се наоѓаат во критична состојба.
Пред три дена на Клиниката бил регистриран уште еден нов случај, со што вкупниот број пациенти со западнонилска треска кои досега се лекувале во оваа здравствена установа достигна 68.
Здравствените власти продолжуваат да ја следат состојбата со заболувањето.
