Палестинскиот доктор кој загуби девет деца во израелски воздушен напад врз градот Кан Јунис во јужниот дел на Појасот Газа почина од повредите, соопштија локалните здравствени власти.
Хамди Ал-Наџар беше сериозно повреден кога израелските сили го бомбардираа неговиот дом на 24 мај, соопштија извори.
Фотографиите од агенцијата Анадолија покажуваат дека Хамди Ал-Наџар страда од тешки повреди на главата.
Неговата сопруга, педијатарот Ала Ал-Наџар беше скршена кога, додека беше на должност во болницата Насер, ги прими телата на своите девет деца кои беа убиени во истиот напад. Во нападот врз нивниот дом беа повредени и единственото преживеано дете, Адам, и таткото, д-р Хамди Ал-Наџар.
Британски хирург кој работи во болницата рече дека оперирал 11-годишно момче кое преживеало.
Цивилната одбрана на Газа објави вознемирувачки снимки од местото на нападот. На снимката се гледа како медицински лица креваат ранет маж на носилка, додека други се обидуваат да изгаснат пожар што зафатил куќа. Телата на неколку деца се пронајдени во урнатините и завиткани во бели чаршафи.
Израелската војска по нападот соопшти дека нејзините авиони погодиле „неколку осомничени“ во Кан Јунис, додавајќи дека „тврдењето за цивилни жртви кои не биле вклучени во борбите моментално е под истрага“.
Израелските одбранбени сили (ИДФ) соопштија дека „авионите погодиле неколку осомничени кои биле идентификувани додека работеле од објект во непосредна близина на израелските трупи во областа Кан Јунис“. „Областа Кан Јунис е опасна воена зона. Пред почетокот на операциите, ИДФ евакуирале цивили од областа за нивна безбедност“, соопшти израелската војска.
Мунир ал-Барш, генерален директор на Министерството за здравство на Газа, по нападот изјави дека сопругот на д-р Наџар штотуку се вратил дома кога куќата била погодена. „Девет од нивните деца беа убиени: Јахја, Ракан, Раслан, Гебран, Ева, Ривал, Сајден, Лукман и Сидра“, напиша Барш на платформата X. Тој додаде дека сопругот е на интензивна нега.
„Ова е реалноста со која нашите здравствени работници во Газа се соочуваат секој ден. Зборовите не можат да ја опишат болката. Во Газа, не се само здравствените работници кои се цел – израелската агресија уништува цели семејства“, рече Барш.
Ахмад ал-Фара, доктор во болницата Насер, за Си-Ен-Ен изјави дека д-р Наџар продолжила да работи откако ги изгубила своите деца, повремено проверувајќи го својот сопруг и нивното единствено преживеано дете, 11-годишниот Адам. Таткото и синот биле подложени на две операции и сè уште се лекуваат, рече Фара.
Јусеф Абу ал-Риш, висок функционер во Министерството за здравство, рече дека д-р Наџар ги оставила своите деца дома за да „ја исполни својата должност и својот повик кон болните деца за кои болницата Насер е единственото засолниште“. Кога пристигнал во болницата, ја нашол „како стои исправена, мирна, трпелива и прибрана, со поглед на прифаќање. Таа не изговарала ништо освен тивки шепотења упатени кон Бога и молитви за прошка“.
Во интервју снимено од новинската агенција АФП, член на семејството на Јусеф ал-Наџар рекол: „Доста! Смилувај ни се! Ги молиме сите држави, меѓународната заедница, народот, Хамас и сите фракции да ни се смилуваат. Уморни сме од прогон и глад, доста!“
Д-р Наџар има 38 години и е педијатриски специјалист, но како и повеќето лекари во Газа, таа работи во одделот за итни случаи за време на израелските напади.
