Тед Тарнер, медиумскиот визионер и филантроп кој ја основа CNN, првата 24-часовна новинска мрежа која фундаментално ги промени телевизиските вести, почина денеска на 87-годишна возраст, соопшти Turner Enterprises.
Кога CNN започна со емитување на 1 јуни 1980 година, многумина ја сметаа идејата за нереална. Но Тарнер веруваше дека луѓето сакаат вести во секое време – визија која целосно ја промени телевизијата и новинарството.
Во текот на кариерата, тој ги прошири своите бизниси со канали како Turner Broadcasting System, Cartoon Network и Turner Classic Movies. Во 1996 година ја продаде својата компанија на Time Warner за околу 7,5 милијарди долари, но остана активен во индустријата.
Освен медиумите, Тарнер беше познат и по својата филантропија. Тој ја основа United Nations Foundation и донираше милијарда долари за поддршка на глобални иницијативи, вклучително и кампањи за нуклеарно разоружување и заштита на животната средина.
Во 2018 година откри дека боледува од Lewy body dementia, прогресивно невролошко нарушување. И покрај здравствените предизвици, тој остана јавна личност и често зборуваше за своето најголемо дело – CNN, кое го нарекуваше „најголемото достигнување“ во својот живот.
Тарнер зад себе остави пет деца, 14 внуци и двa правнуци. Неговото наследство останува длабоко врежано во современото новинарство, како човек кој ја отвори ерата на глобални вести во реално време.
