Здружението за едукација, промоција и заштита на здравствените и човековите права „Биди Човек“ и пензионерското движење (ИОПД) „Тука сме“ денеска ќе го одбележат Денот на возрасните лица – 1-ви Октомври со панел дискусија и проекција на краткиот филм „Шарац“ во Домот на хуманитарните организации „Даре Џамбаз“, во Скопје. Како што посочуваат од Здружението, овој ден служи како витален потсетник за признавање на непроценливиот придонес на возрасните поединци за нашето општество и важноста да се обезбеди нивната благосостојба.
Филмот „Шарац“, пак, се осврнува на менталните и физичките здравствени предизвици со кои се соочува постарата генерација, вклучувајќи изолација, проблеми со менталното здравје и ограничен пристап до здравствена заштита.
– Целите на панел дискусијата се да ја подигнеме свеста за уникатните предизвици со кои се соочуваат постарите поединци, да развиеме дискусија за важноста на поддршката и ангажманот на заедницата за благосостојбата на постарите. На панелот ќе идентификуваме акциони стратегии за подобрување на пристапот до здравствена заштита и ресурси за постарите возрасни лица. Ќе се обидеме да ги истакнеме придобивките од негувањето врски меѓу генерациите за борба против изолацијата и промовирање на кохезијата во заедницата и како поединците, заедниците и креаторите на политики можат да работат заедно за поддршка на постарата популација, стои во соопштението.
Покрај панелот, предавање ќе одржи д-р Лејла Манчев, специјалист по физикална медицина и рехабилитација врз квалитетот на животот кај пациентите со саркопенија на возраст на и над 65 години.
Активности на Биди човек по повод 1 Октомври -Денот на возрасните лица кои што се насловени „Благосостојба низ целиот животен век“, ќе се одржат и на 30 октомври, од 20 часот со прикажување на краткометражен филм „Шарац“ на филмскиот фестивал Култиватор, во кафе бар Кино Карпош, во Скопје.
-„Шарац“ е повеќе од само филм; тоа е моќен наратив кој ја истражува реалноста на стареењето. Преку привлечно раскажување на приказната и автентични ликови, имаме за цел да поттикнеме емпатија и разбирање, охрабрувајќи ги гледачите да се вклучат во значајни разговори за менталното и физичкото здравје на возрасните лица. Нашата цел е да ги инспирираме и поединците и заедниците да преземат активни чекори кон подобрување на животот на нашите возрасни сограѓани, подвлекуваат од Здружението.
Воспоставен од Обединетите нации во 1990 година, Денот на возрасните лица ја нагласува потребата општествата да го вреднуваат и поддржуваат стареењето на своето население.
