Новиот играч на Ал Наср, Кристијано Роналдо, ја прекинал соработката со својот долгогодишен менаџер Жорге Мендеш. Според португалските медиуми, трансферот во Саудиска Арабија го реализирал Рикардо Регуфе.
Роналдо и Мендеш соработуваат повеќе од 20 години, а прекинот на соработката наводно се случил во ноември минатата година.
Португалските медиуми тврдат дека славниот менаџер му бил лут на Роналдо, најпрвин за интервјуто што му го даде на Пирс Морган, во кое го критикува клубот, неговите челниви и тренерот, а потоа и дека самоволно решил да го раскине договорот со Манчестер јунајтед.
„Овој потег на Роналдо го навреди Мендеш, кој со месеци бараше клуб за португалскиот фудбалер. Мендеш во 2021 година успеа да ги убеди челниците на Манчестер јунајтед да го вратат Роналдо. Тој не знаел ништо за плановите на португалскиот фудбалер“, пренесуваат португалските медиуми.
Пред да го потпише договорот со Ал Наср, Роналдо ги откажал сите права на ликот и делото, кои во име на португалскиот фудбалер ги наплатувале компаниите на Мендеш.
Португалските медиуми потсетуваат дека Роналдо потпишал договор со Ал Наср до јуни 2025 година, според кој ќе заработува 200 милиони евра годишно. Мендеш од овој договор требаше да добие провизија од најмалку 30 милиони евра.
Роналдо за нов менаџер го ангажираше Рикардо Регуфе, кој е човек од доверба на португалскиот фудбалер.
За време на соработката со Роналдо, Мендеш од различни провизии заработил повеќе од 100 милиони евра.
