Неофицијалната кампања почната во ДУИ под слоганот „Да! Тој доаѓа“, денеска ја разбранува македонската јавност.
Многумина ова го толкуваат и го поврзуваат со кампањата што деновиве се најавува од страна на членството на ДУИ, а се однесува на избор на прв премиер Албанец во Македонија.
Своето мислење за кампањата на ДУИ како и можноста Македонија да добие премиер Албанец, на својот фејсбук профил го искажа и Тито Петковски.
,,Читам :”Да!Тој доаѓа”е новиот слоган на ДУИ со кој се најавува првиот премиер Албанец.
Се надевам дека мислат на Фатмир Битиќи,Заменик на Премиерот за економски прашања.
По компетентен,по стручен,по способен и по одговорен член на Владата,во овој момент не постои.
Освен тоа,Албанец е по етничка припадност.Токму онаков каков што бара ДУИ!”, напиша Петковски.
Да потсетиме. Бујар Османи пред неколку дена најави дека набргу Албанец ќе биде премиер, со што потсети на договорот со СДСМ од деновите на последното коалирање, а тоа подоцна беше дообјаснето од Артан Груби.
Во изјава за косовска телевизија Груби рече дека договорот што бил постигнат меѓу лидерот Али Ахмети и поранешниот премиер Зоран Заев предвидува во последните 100 дена од мандатот на Владата функцијата да ја извршува Албанец.
Груби рече дека нема амбиции да го замени актуелниот премиер Димитар Ковачевски, туку дека изборот ќе го направи лидерот Али Ахмети.
Од партијата не откриваат на што се однесува новиот проект.
