Папата Франциск денеска ги повика Иран и Израел да избегнат чекори кои би можеле да поттикнат „спирала на насилство“ што би ризикувала да го втурне Блискиот Исток подлабоко во конфликт.
Обраќајќи им се на верниците на плоштадот Свети Петар, папата Франциск рече дека со загриженост и болка ја следел веста за иранскиот напад со беспилотни летала и ракети врз Израел.
„Апелирам од дното на моето срце да се прекине со секоја акција што може да поттикне спирала на насилство со ризик да го вовлече Блискиот Исток во уште поголем конфликт“, посочи тој.
Папата Франциск рече дека никој не треба да го загрозува постоењето на другите.
„Наместо тоа, сите нации треба да се залагаат за мир и да им помогнат на Израелците и Палестинците да живеат во две држави, рамо до рамо, безбедно“, додаде тој.
Папата Франциск повика на прекин на огнот во Газа и почеток на преговори за да се овозможи доставување хуманитарна помош до нејзиниот народ и да се помогне во ослободувањето на израелските заложници, земени од Хамас во нападот на Израел на 7 октомври.
„Доста е војна, доволно напади, доволно насилство. „Да за дијалогот, да за мирот“, нагласи тој.
