Најдобриот стрелец и рекордер по настапи во историјата на македонската фудбалска репрезентација, Горан Пандев, се наоѓа во Скопје, каде што имаше неформална средба со Масар Омерагиќ, кандидатот за претседател на Фудбалската федерација на Македонија (ФФМ).
На социјалните мрежи, Пандев сподели фотографија со Омерагиќ, придружена со пораката: „минато, сегашност, иднина“. Пандев и претходно јавно изрази поддршка за кандидатурата на Омерагиќ, нагласувајќи дека е време за промени во македонскиот фудбал.
Собранието на ФФМ, закажано за 22 декември, треба официјално да го назначи Омерагиќ за претседател. Со фигура од светски размери како Горан Пандев на негова страна, очекувањата за промени и напредок во македонскиот фудбал значително растат.
