“Во последниот период, ОЈО Битола работеше на повеќе тешки и сложени предмети особено од областа на економскиот и финансискиот криминал и сомнителни јавни набавки. Новоформираниот истражен центар треба дополнително да ги зајакне капацитетите за истражување најмногу на овие, но и на други кривични дела”, нагласи Јавниот обвинител на Република Северна Македонија Љупчо Коцевски, кој го означи стартот на работата на истражниот центар.
Ова е петтиот по ред истражен центар формиран во Јавното обвинителство согласно член 45 од Законот за кривична постапка. Вакви истражни центри веќе функционираат во обвинителствата во Скопје, Тетово, Куманово и во ОЈОГОКК, а државниот јавен обвинител ги истакна нивните досегашни резултати.
“Во истражниот центар на Основното јавно обвинителство за гонење на организиран криминал и корупција во моментов се ангажирани над 20 истражители. Благодарение на донациите од нашите странски партнери, пред се од американската амбасада и од Европската унија кои се и денеска тука со нас, тој истражен центар има една од најсовремените лаборатории за дигитална форензика во регионот и опремен центар за аналитика.
Во истражниот центар во Основното јавно обвинителство Скопје во моментов има 9 истражители и уште 5 кои се повлечени од Министерството за внатрешни работи со наредба за работа на посебно тешки и сложени предмети. Во ова, најголемо обвинителство по обемот на работа, активностите на истражниот центар континуирано растат и практично се удвојуваат на годишно ниво. Така, во 2021 година истражителите постапувале во 99 предмети, во 2022 година во 150 предмети, во текот на 2023 година во вкупно 287 предмети, а во 2024 година постапувале во дури 665 предмети, во кои биле преземени 1476 оперативни истражни дејствија. Истиот тренд на раст продолжува и оваа година, така што истражниот центар во ОЈО Скопје само во првата половина на годинава заклучно со јуни веќе постапувал во околу 430 предмети, во кои биле преземени вкупно 1065 оперативни истражни дејствија, од кои еден исклучително тежок – пожарот во кочанската дискотека „Пулс“ каде за дел од дејствијата беа ставени на располагање истражните центри на ОЈО Скопје и на ОЈОГОКК”, наведе Коцевски.
Во истражниот центар на ОЈО Битола за почеток се ангажирани двајца истражители, но не е исклучено нивниот број да се зголемува, најави основната јавна обвинителка Оливера Нечаковска.
“Сметам дека најдобрите и најефикасни резултати во откривањето и гонењето на сторителите на сериозни кривични дела се постигнуваат на овој начин, со директна и континуирана тимска работа помеѓу органите на прогонот и обвинителството. Во моментов работиме на обезбедување целосна функционалност на истражниот центар преку поврзување со базите на податоци со кои располага МВР, како и преку електронско поврзување со базите на податоци на АКН, Централниот Регистар, Централниот депозитар за хартии од вредност и сите други институции со кои соработуваме во истрагите и постапките кои ги водиме. Со сите овие институции сме во завршна фаза на склучување договори за соработка и обезбедување на непречен пристап за нашите истражители до нивните бази на податоци што во голема мера ќе ни ја олесни работата и ефикасноста во постапувањето”, додаде шефицата на битолското обвинителство.
На отворањето присуствуваа повеќе јавни обвинители, претставници на Министерството за внатрешни работи, како и на Амбасадата на САД и на европски проекти кои во изминатиот период ја поддржуваат работата на останатите истражни центри со експертиза и донации во опрема и технологија.
Напредокот во функционирањето и целосната функционалност на истражните центри на Јавното обвинителство се истакнати и во последниот извештај на Европската комисија за состојбата со владеењето на правото во нашата држава.
